ಮಾಮರವೆಲ್ಲೋ, ಕೋಗಿಲೆಯೆಲ್ಲೋ......

ಇನ್ನೂ ಮಳೆಗಾಲ ಬಂದಿಲ್ಲ, ಗಾಳಿ ಜೋರಾಗಿ ಬೀಸಿತೋ, ವಿದ್ಯುತ್ ಹೋಗಿಯೇ ಬಿಟ್ಟಿತು, ಎಲ್ಲಿಗೇ ? ಅದರಪ್ಪನ ಮನೆಗೇ ಕಂಬಿ ಕಿತ್ತಿತು. ಬೀಸಿದ ಗಾಳಿಯಿಂದಾಗಿ ವಾತಾವರಣವೆಲ್ಲ ತಂಪು ತಂಪಾಯಿತು. ಪ್ರಕೃತಿಮಾತೆಯ ಈ ವಾತಾನುಕೂಲೀ ವ್ಯವಸ್ಥೆಯಿಂದಾಗಿ ಸುಖವಾಗಿ ರಾತ್ರಿ ಬೆಳಗಾಯಿತು. ಮಗಳಂತೂ ಸಿಡಿ ಸಿಡಿಗುಟ್ಟುತ್ತ " ಅಪ್ಪಾ, ಮೊದಲು ಕರೆಂಟ್ ಸರಿ ಮಾಡ್ಸೀ..." ಅನ್ನಲು ಪ್ರಾರಂಭಿಸಿದಳು. ಅದೇನೋ ಕಂಪ್ಯೂಟರು್ರ ವರ್ಕು ತುಂಬಾನೇ ಇದೆಯಂತೆ. ನಂಗೂ ಇತ್ತು ಫೇಸ್ ಬುಕ್ ವರ್ಕು.

ಒಳಗೇ ಕುಳಿತಿದ್ದು ಉದಾಸೀನ ಬಡಿದು ಮಾಡಲು ಉದ್ಯೋಗವೇನೂ ತೋಚದೆ ನಮ್ಮ ಹುಡುಗಿ " ಅಮ್ಮಾ, ಮಾವಿನಕಾಯ್ ಆಗಿಲ್ವಾ '" ಅಂತಾ ಕೇಳಿದ್ಳು, ಬೀಂಬುಳಿ ಮರದ ಬುಡದಲ್ಲಿದ್ದ ದೋಟಿ ತಗೊಂಡು ತೋಟಕ್ಕೆ ಹೊರಟಳು. " ಅಲ್ಲೊಂದು ಪಾದೆಕಲ್ಲು ಇದೇ ನೋಡೂ... ಆ ಮಾವಿನಮರ ನೋಡಿ ಬಾ "

" ಥುತ್, ಯಾವುದರಲ್ಲೂ ಇಲ್ಲ " ಕೈ ಬೀಸಿಕೊಂಡು ಬಂದಳು.

" ಹೌದಾ, ಆ ದೊಡ್ಡ ಮಾವಿನಮರದ ಬುಡಕ್ಕೆ ಹೋಗಿ ನೋಡಲ್ಲ... ಸುರಂಗದ ಹತ್ತಿರ " ಪುಸಲಾಯಿಸದೇ ಬೇರೆ ದಾರಿಯಿಲ್ಲ.

ಕುಣಿಯುತ್ತಾ ಬಂದಳು, ವರ್ಷದ ಮೊದಲ ಮಾವಿನಹಣ್ಣಿನ ಸಂಪಾದನೆ ಅವಳದು. " ಅಪ್ಪಂಗೆ ಕೊಡ್ಬೇಡಾ, ಇದು ನನ್ನದು "

" ಆಯ್ತೂ, ಒಂದು ದಿನ ಇಟ್ಟು ತಿಂದರೆ ಸಿಹೀ ಆಗಿರುತ್ತೆ.... "

" ನಾಳೆ ನಾನು ಹೋಗ್ತೀನಲ್ಲ...."

" ಹಂಗಿದ್ರೆ ಸಂಜೆ ಪುನಃ ಮಾವಿನಮರದ ಬುಡ ನೋಡಿ ಬಾ, ಹಾಗೇ ಪೇರಳೇನೂ ಕೊಯ್ದು ಇಟ್ಕೋ... ರೂಮಿನಲ್ಲಿ ತಿನ್ನುವಿಯಂತೆ "

ಬಾನಿನಲ್ಲಿ ಹೊಳೆವ ರೊಟ್ಟಿ

ಬೀಟ್ರೂಟು ಹೋಳು ಮಾಡುತ್ತಿದ್ದ ಹಾಗೇ ಕೆಲವನ್ನು ತೆಳ್ಳಗೆ ಬಿಲ್ಲೆಗಳಾಗಿಸಿ ಇಟ್ಕೊಂಡಿದ್ದೆ, ಸಂಜೆಗೊಂದು ತಿನಿಸು ಮಾಡೋಣಾಂತ. ಮತ್ತೇನಿಲ್ಲ, ಕಡ್ಲೇಹಿಟ್ಟಿನಲ್ಲಿ ಮುಳುಗಿಸಿ ಪೋಡಿ ಕರಿಯೋಣಾಂತಿದ್ದೆ. ಸಂಜೆ ಮಗಳು ಬರುವವಳಿದ್ದಾಳೆ ಬೇರೆ, ಹೀಗೆಲ್ಲ ಕನಸುಗಳು...

ಊಟದ ಹೊತ್ತಿಗೆ ತಿಳಿಯಿತು, ಇವಳು ಈ ವಾರದಲ್ಲಿ ಬರುವಂತಿಲ್ಲ. ಏನೇ ಮಾತುಕತೆ ಇದ್ದರೂ ಅಪ್ಪನ ಬಳಿಯೇ ಹೇಳಿಕೊಳ್ಳುವ ಮಗಳು, ಸರಿ. ಊಟ ಮುಗಿಸಿ, ಐಪಾಡ್ ಬಿಡಿಸಿ, ಈಗ iPadAir2 ಬೇರೆ ಬಂದಿದೆ. ಫೇಸ್ ಬುಕ್ಕು, ಟ್ವೀಟಿಂಗು ಎಲ್ಲಾದಿಕ್ಕೂ ಕನ್ನಡ ಕೀ ಪ್ಯಾಡ್ ಸಲೀಸು. ಬರೆದು ಕಾಪೀ ಪೇಸ್ಟ್ ಮಾಡೋ ರಗಳೆ ಇಲ್ವೇ ಇಲ್ಲ. ಒಂದೆರಡು ಟ್ವೀಟ್ ಗಳಿಗೆ ಕನ್ನಡದಲ್ಲೇ ಪ್ರತಿಕ್ರಿಯಿಸಿ, ಮದ್ಯಾಹ್ನದ ಸುಖನಿದ್ರೆ ತೆಗೆದು ಯಥಾಪ್ರಕಾರ ಅಡುಗೆಮನೆಗೆ ಬಂದಾಗ ಬೀಟ್ರೂಟು ಬಿಲ್ಲೆಗಳ ಸ್ವಾಗತ ದೊರೆಯಿತು.

ಮಕ್ಕಳು ಮನೆಯಲ್ಲಿದ್ದರೆ ಎಣ್ಣೆಯಲ್ಲಿ ಕರಿದ ತಿಂಡಿಗಳ ಸಂಭ್ರಮ. ಬೀಟ್ರೂಟ್ ಮೂಲೆಗೆ ಹೋಯಿತು. ಸಂಜೆಯ ಚಹಾ ಕುಡಿದ ನಂತರ ನಾಳೆಗೇನು ತಿಂಡಿ ಮಾಡಲೀ ಎಂಬ ಚಿಂತೆ, ತುಂಡು ಮಾಡಿಟ್ಟ ಬೀಟ್ರೂಟಿಗೆ ಹೇಗೆ ಗತಿ ಕಾಣಿಸಲೀ ಎಂಬ ಚಿಂತೆ ಇನ್ನೊಂದೆಡೆ.
ಚಹಾ ಕುಡಿದಾದ ನಂತರ ತೋಟದಲ್ಲಿ ಅಡ್ಡಾಡಿ ಬರುವ ವಾಡಿಕೆ, ಕೈಯಲ್ಲಿ ಚಿಕ್ಕದೊಂದು ಕತ್ತಿ ಇರಲೇಬೇಕು. ತೋಟದೊಳಗೆ ಮುಂದುವರಿಯುತ್ತಿದ್ದ ಹಾಗೆ ಬುಡಸಹಿತ ಬಿದ್ದ ಬಾಳೆ ಎದುರಾಯಿತು, ಗೊನೆ ಹಾಕಿಲ್ಲ, ಏನಿಲ್ಲ, ಕಾಡುಹಂದಿಯ ಪ್ರತಾಪ. ಕಾಂಡವನ್ನು ಹಿಂಡಿಹಿಪ್ಪೆ ಮಾಡಿ ಬೇರುಗಡ್ಡೆಯನ್ನು ತಿನ್ನುವ ಸಾಹಸಿ ಹಂದಿ ಬಂದಿದೆ. ಬಾಳೆ ಎಲೆಗಳು ಇನ್ನೂ ಹಚ್ಚಹಸಿರಾಗಿ ನಳನಳಿಸುತ್ತಿವೆ. ಬಹುಶಃ ನಿನ್ನೆ ರಾತ್ರಿಯ ಹಂದೀ ಕಾರ್ಬಾರು. ಹೋಗಲಿ, ಈ ಬಾಳೆ ಎಲೆಗಳು ಕತ್ತಿಯೇಟಿಗೆ ನನ್ನ ಕೈ ಸೇರಿದುವು. ನಾಳೆ ಅಕ್ಕಿರೊಟ್ಟಿ ಮಾಡೋಣ.

ರೊಟ್ಟಿಯ ಏರ್ಪಾಡು ಏನಿದ್ದರೂ ನಾಳೆಗೆ. ಬಾಳೆಲೆ ರೂಢಿಸಿಕೊಂಡಿದ್ದಾಯಿತು. ಬೆಳಗೂ ಆಯಿತು. ಇಬ್ಬರಿಗೆ ಎರಡು ಲೋಟಾ ಅಕ್ಕಿಹುಡಿ ಸಾಕಾದೀತು. ಅಳೆದಾಯಿತು, ತಪಲೆಗೆ ಸುರುವುತ್ತಿದ್ದಾಗ ಮೂಲೆಗೆ ಒತ್ತರಿಸಲ್ಪಟ್ಟ ಬೀಟ್ರೂಟು ಕಣ್ಣಿಗೆ ಬಿತ್ತು. ಅಪ್ರಯತ್ನವಾಗಿ ಕೈಗೆತ್ತಿ ಚಕಚಕನೆ ಕತ್ತರಿಸಿ ಮಿಕ್ಸಿಯ ಜಾರೊಳಗೆ ಸೇರಿದ ಬೀಟ್ರೂಟು ಕೆಂಪು ಮುದ್ದೆಯಾಗಿ ಹೊರ ಬಂದಿತು.

2 ಲೋಟ ಹಿಟ್ಟಿಗೆ 3 ಲೋಟ ನೀರು ಕುದಿಯಿತು. ರುಚಿಗೆ ತಕ್ಕ ಉಪ್ಪು ಬೆರೆತು ಬೀಟ್ರೂಟ್ ಮುದ್ದೆಯೂ ಕೂಡಿದಾಗ ಅಕ್ಕಿಹಿಟ್ಟಿನ ಮುದ್ದೆ ದೊರೆಯಿತು.
ರೊಟ್ಟಿಮಣೆ ಹೊರಗೆ ಬಂದಿತು. ಧೂಳು ಕೊಡವಿ ಬಾಯ್ದೆರೆಯಿತು.
ಬಾಳೆ ಎಲೆ ಎಣ್ಣೆ ಪೂಸಿಕೊಂಡು ಸಿದ್ಧವಾಯಿತು.
ತಡವೇಕೆ ಅಕ್ಕಾ, ರೊಟ್ಟಿ ಒತ್ತಿ ಆಯಿತೇ, ಕಾದ ತವಾ ಮೇಲೆ ಬಿದ್ದಿತೇ, ಉರುಳಿ ಹೊರಳಿ ಬೆಂದ ರೊಟ್ಟಿ ಹಾರಿಹೋಯಿತೇ, ಗಗನದಲ್ಲಿ ಮಿನುಗಿತೇಕೆ....ಹೇಳಕ್ಕಾ!
ತಟ್ಟೆಯಲ್ಲಿ ತಂದು ಇಟ್ಟೆ,

ಬಾನಿನಲ್ಲಿ ಹೊಳೆವ ರೊಟ್ಟಿ !

ಬೀಟ್ರೂಟ್ ದೋಸೆ:

ರೊಟ್ಟಿ ತಯಾರಿಗೆ ಉದಾಸೀನವೇ, ದೋಸೆಯನ್ನೂ ಮಾಡಬಹುದು. ಹೇಗೂ ದೋಸೆಗೇಂತ ಹಿಟ್ಟು ತಯಾರಿಸಿಯೇ ಇಟ್ಟಿರ್ತೀರ. ಸಂಜೆಯ ತಿನಿಸಿಗೆಂದು ದೋಸೆಹಿಟ್ಟು ಇಟ್ಟುಕೊಂಡಿದ್ದೀರ ತಾನೇ, ಈ ಹಿಟ್ಟಿಗೆ ಚಿಕ್ಕ ಬೀಟ್ರೂಟು ತುಂಡನ್ನು ನುಣ್ಣಗೆ ಪುಡಿ ಮಾಡಿ ದೋಸೆಹಿಟ್ಟಿಗೆ ಕೂಡಿಸಿ. ದೋಸೆ ಎರೆದುಕೊಳ್ಳಿ. ಬೀಟ್ರೂಟ್ ಗೆಡ್ಡೆಗೆ ಅಡ್ಡವಾಸನೆ ಏನೇನೂ ಇಲ್ಲವಾದುದರಿಂದ " ದೋಸೆಗೆ ಈ ಬಣ್ಣ ಹೇಗೆ ಬಂತೂ...." ಪ್ರಶ್ನೆಗೆ ಉತ್ತರಿಸಲೇ ಬೇಡಿ. ದೋಸೆ

ಮಾತ್ರವೇಕೆ, ಇಡ್ಲಿ, ಉಪ್ಪಿಟ್ಟು ಇತ್ಯಾದಿಗಳಿಗೂ ಬಣ್ಣ ಬಳಿಯಿರಿ. ತಣ್ಣಗೆ ಪಾನಕ ಯಾ ಶರಬತ್ತು ಮಾಡುವಾಗಲೂ ತುಸುವೇ ಬೀಟ್ರೂಟ್ ಹಾಕಿದ್ರೂ ಸಾಕು, ವರ್ಣಭರಿತ ಜ್ಯೂಸ್ ಸಿದ್ಧ. ನಾಳೆ ಅಕ್ಕಿ ಸಂಡಿಗೆ ಮಾಡೋಣಾಂತಿದೀನಿ, ಪೇಟೆಯಿಂದ ಬೀಟ್ರೂಟ್ ತರಿಸಿ ಆ ಮೇಲೆ ಬಣ್ಣದ ಸಂಡಿಗೆ ಮುಂಡಿ ಎಲೆಯ ಮೇಲೆ ಎರೆದು ಒಣಗಿಸಿ, ಎಣ್ಣೆಯಲ್ಲಿ ಕರಿದು, ಅದನ್ನು ನನ್ನ ಮಗಳು ತಿಂದು ನೋಡಿ ಶಿಫಾರಸ್ಸು ಕೊಟ್ಟ ನಂತರ ಇಲ್ಲಿಗೂ ತರದಿರುತ್ತೇನಾ.....

ಇರವಿನ ಅರಿವು

ಅಂತರ್ಜಾಲದಲ್ಲಿ ಕನ್ನಡ ಬರಹಗಳ ಬ್ಲಾಗ್ ಓದುಗ ಮಹನೀಯರಿಗೆ ಸೌರಮಾನ ಯುಗಾದಿಯ ಶುಭಾಶಯಗಳು.



ಫೋಟೋ ಕೃಪೆ: ಪದ್ಯಾಣ ರಾಮಚಂದ್ರ, ದುಬೈ

ಟಿಪ್ಪಣಿ:   ತಾ. 28 - 5 - 2016ರಂದು ಬರೆದ ಹನಿಗವನ

                                  

  

ಬೀಟ್ ರೂಟ್ ರಸಾಯಣ

ಬೀಟ್ ರೂಟ್ ಗೆಡ್ಡೆ ತರಕಾರಿ, ಮಾರುಕಟ್ಟೆಯಲ್ಲಿ ಬೆಲೆಯೂ ಕಡಿಮೆ, ತರಕಾರಿ ಎಂದು ಮನೆಗೆ ತಂದರೂ ಇನ್ನೂ ಅಸಡ್ಡೆ. ಆದರೇನಂತೆ, ಇನ್ನಿತರ ತರಕಾರಿಗಳಂತೆ ಹಾಳಾಗುವಂತಹುದಲ್ಲ, ಹಲವು ದಿನಗಳ ಬಳಕೆಗೆ ಯೋಗ್ಯ. ನನ್ನ ಮಗಳೂ ಇದರ ಪದಾರ್ಥಗಳನ್ನು ಇಷ್ಟಪಡುವವಳಲ್ಲ. " ನಾನು ಮನೆಯಲ್ಲಿರುವಾಗ ಬೀಟ್ರೂಟು ಕೊದಿಲು ಮಾಡ್ಬೇಡಾ...." ಹೀಗೆ ಹುಕುಂ ಇರುವಾಗ, ಬೀಟ್ ರೂಟ್ ಮನೆಗೆ ಬಂದಿತು. " ಯಾಕೆ ತಂದ್ರೀ... " ಎಂದು ಕೇಳಲುಂಟೇ, ಮಾಡೋಣ.

" ಪಲ್ಯ ಆದೀತಲ್ಲ ಮಗಳೇ... "
" ಹ್ಞೂ..."
ಸಿಪ್ಪೆ ತೆಳ್ಳಗೆ ಹೆರೆದು ತೆಗೆದು, ಬಿಲ್ಲೆಗಳಂತೆ ಕತ್ತರಿಸಿ, ಅಡ್ಡಕ್ಕೂ ಉದ್ದಕ್ಕೂ ಪೀಸಕತ್ತಿ ಚಕಚಕನೆ ಓಡಿಯಾಡಿದಾಗ ಪಲ್ಯದ ಸಾಮಗ್ರಿ ಸಿದ್ಧ.
ತೆಂಗಿನತುರಿ ಇರಬೇಕು.
ಒಗ್ಗರಣೆ ಸಾಹಿತ್ಯ: ಎಣ್ಣೆ, ಸಾಸಿವೆ, ಉದ್ದಿನಬೇಳೆ, ಒಣಮೆಣಸು, ಕರಿಬೇವು, ಚಿಟಿಕೆ ಅರಶಿಣ.
ರುಚಿಗೆ ತಕ್ಕ ಉಪ್ಪು.
ಗೆಡ್ಡೆ ತರಕಾರಿಯಾದ್ದರಿಂದ ಬೇಯಿಸಲು ಕುಕ್ಕರ್ ಆದೀತು, ಬೇಯಲು ಬೇಕಾದ ನೀರೆರೆದು, ಉಪ್ಪು ಕೂಡಿಸಿ. ಒಂದು ಶೀಟಿ ಕೇಳುವ ತನಕ ಬೆಂದರೆ ಸಾಕು.

ಬಾಣಲೆಯಲ್ಲಿ ಒಗ್ಗರಣೆಗಿಡಿ.
ಸಾಸಿವೆ ಸಿಡಿದಾಗ ಕರಿಬೇವು, ಅರಶಿಣ ಹಾಕಿಡಿ.
ಬೆಂದ ತರಕಾರಿಯನ್ನು ಕೂಡಿ.
ತೆಂಗಿನತುರಿಯನ್ನು ಮರೆಯಬೇಡಿ.
ನೀರಾರುವ ತನಕ ಸೌಟಾಡಿಸಿ ಮುಚ್ಚಿಡಿ.
ತಾಜಾ ಬೀಟ್ ರೂಟ್ ಪಲ್ಯ ರೆಡಿ.

ಬೀಟ್ ರೂಟ್ ಸಾಸಿವೆ:
ತೆಂಗಿನತುರಿ, ಬೀಟ್ ರೂಟ್ ತುರಿ, ಸಾಸಿವೆ, ಹಸಿಮೆಣಸಿನೊಂದಿಗೆ ಆ ದಿನದ ಸಿಹಿ ಮಜ್ಜಿಗೆ ಎರೆದು ನುಣ್ಣಗೆ ಅರೆಯಿರಿ. ರುಚಿಗೆ ತಕ್ಕ ಉಪ್ಪು ಕೂಡಿಸಿ. ಕುದಿಸುವ ಕೆಲಸ ಇಲ್ಲಿಲ್ಲ. ಅನ್ನದೊಂದಿಗೆ ಸವಿಯಿರಿ.

ಬೀಟ್ ರೂಟ್ ಗೊಜ್ಜು:

ಬೀಟ್ ರೂಟ್ ತುರಿದು ಕೊಳ್ಳಿ. ಹೆಚ್ಚೇನೂ ಬೇಡ. ಮೊಸರು, ಉಪ್ಪು ಬೆರೆಸಿ, ಗೊಜ್ಜು ಅನ್ನಿ. ಮಕ್ಕಳಿಗೆ ಅನ್ನದೊಂದಿಗೆ ಕಲಸಿ
ತಿನ್ನಲು ಇಷ್ಟವಾದೀತು. ಬೀಟ್ ರೂಟ್ ಅಡುಗೆ ಮುಗಿಯಿತೇ, ಇನ್ನೂ ಇದೆ. ಬೀಟ್ ರೂಟ್ ತಂದಿಟ್ಕೊಂಡಿರಿ.....

ಬೀಟ್ ರೂಟ್ ಗೆಡ್ಡೆಗೆ ಕನ್ನಡದಲ್ಲಿ ಪ್ರತ್ಯೇಕ ಹೆಸರು ಇದ್ದಂತಿಲ್ಲ. ಅಮೇರಿಕಾ ಇದರ ಮೂಲನೆಲೆ. ನಮ್ಮ ಋಷಿಮುನಿಗಳು ಗೆಡ್ಡೆಗೆಣಸು, ಕಂದಮೂಲಾದಿಗಳನ್ನು ಬಲ್ಲವರಾಗಿದ್ದರು. ಈ ಪರಿಯ ವರ್ಣದ್ರವ್ಯ ನಮ್ಮ ಆಯುರ್ವೇದ ರಸಾಯನಶಾಸ್ತ್ರದಲ್ಲೂ ಇದ್ದ ಹಾಗಿಲ್ಲ. ಹೋಗಲಿ, ಚಿಂತೆ ಬೇಡ. ನಾವು ಈಗ ಅಮೇರಿಕದ ಆರೋಗ್ಯ ಸಂಸ್ಥೆ ತಿಳಿಸಿರುವ ಆರೋಗ್ಯಲಾಭಗಳನ್ನು ಓದಿಕೊಳ್ಳೋಣ.

ಬೀಟ್ರೂಟ್ ರಸದ ಸೇವನೆ ಒಳ್ಳೆಯದು. ಅತಿಯಾಗಿ ಬೇಡ. ಕಿಡ್ನಿ ತೊಂದರೆ ಇದ್ದರಂತೂ ಮುಟ್ಟದಿರಿ.
ಕ್ಯಾನ್ಸರ್ ಪ್ರತಿಬಂಧಕ. Betacyanin ಎಂಬ ಧಾತು ಈ ಗೆಡ್ಡೆಯಲ್ಲಿರುವುದೇ ವೈದ್ಯಕೀಯ ಮಹತ್ವವನ್ನು ಪಡೆದಿದೆ. ಜೀವಕಣಗಳ ಸಹಜಸ್ಥಿತಿಯನ್ನು ಉಳಿಸುವತ್ತ ಹಾಗೂ ಕ್ಯಾನ್ಸರ್ ಕಣಗಳ ಬೆಳವಣಿಗೆಯನ್ನು ತಡೆಯುವಲ್ಲಿ ಯಶಸ್ಸನ್ನು ಪಡೆದಿವೆ. ಆಹಾರದಲ್ಲಿ ಇರಲೇಬೇಕಾದ ಜೀವಸತ್ವಗಳು ಇದರಲ್ಲಿವೆ. ಮುಖ್ಯವಾಗಿ ವಿಟಮಿನ್9, ಮ್ಯಾಂಗನೀಸ್, ಐರನ್, ವಿಟಮಿನ್ ಸಿ, ಇನ್ನಿತರ ಖನಿಜಗಳಿಂದ ಸಮೃದ್ಧವಾಗಿದೆ. ಅತಿ ಕಡಿಮೆ ಕೆಲೊರಿಯಿಂದ ಕೂಡಿರುವ ಹಾಗೂ ನಾರುಯುಕ್ತ ತರಕಾರಿಯೂ ಹೌದು. ನೖಟ್ರಿಕ್ಓಕ್ಸೖಡ್ (NO) ಕೂಡಾ ಬೀಟ್ರೂಟ್ ಗೆಡ್ಡೆಯಲ್ಲಿರುವಂಥದು. ಇದು ರಕ್ತನಾಳಗಳ ಸಡಿಲಿಕೆಗೆ ಪೂರಕ. ಹೃದಯಸಂಬಂಧೀ ತೊಂದರೆಗಳ ನಿವಾರಕ. ಶರೀರಕ್ಕೂ ತಂಪು.

ಇನ್ನಿತರ ರಸಭರಿತ ಹಣ್ಣುಗಳ ಮಿಶ್ರಣದೊಂದಿಗೆ ಬೀಟ್ರೂಟ್ ತುರಿಯನ್ನೂ ಕೂಡಿಸಿ ಜ್ಯೂಸ್ ಮಾಡಿ ಕುಡಿದರೆ ಹೆಚ್ಚು ಪರಿಣಾಮಕಾರಿ ಎಂದು ಆಹಾರತಜ್ಞರ ಅಭಿಮತ. ಕಬ್ಬಿಣಾಂಶ ಹೇರಳವಾಗಿರುವ ಬೀಟ್ರೂಟ್ ಚರ್ಮದ ಮೇಲಿನ ಕಪ್ಪುಕಲೆ ಮತ್ತು ಮೊಡವೆಗಳ ನಿವಾರಕ. ಬೀಟ್ರೂಟ್ ಸೊಪ್ಪುಗಳೂ ಖಾದ್ಯಯೋಗ್ಯವಾಗಿವೆ. ರುಚಿಯಲ್ಲಿ ಪಾಲಕ್ ಸೊಪ್ಪಿಗೆ ಸಮಾನವಾಗಿರುವುದು. ಹರಿವೆ ಪ್ರವರ್ಗಕ್ಕೆ ಸೇರಿದ ಬೀಟ್ರೂಟ್ ವೖಜ್ಞಾನಿಕವಾಗಿ beta vulgaris ಆಗಿರುತ್ತದೆ.

Posted via DraftCraft app